Lev 5 | ZomZIV | STEP | “‘Mi khat in a muhsa ahikeh a theihsa thu khat peuhpeuh ah teci pang dingin tangpi in a sawla, amah in a muhsa bangin a gen nop kei leh tua mawhna a khu ding hi.

Leviticus 5

1 “‘Mi khat in a muhsa ahikeh a theihsa thu khat peuhpeuh ah teci pang dingin tangpi in a sawla, amah in a muhsa bangin a gen nop kei leh tua mawhna a khu ding hi. ^a

2 “‘Ahikeh mi khat in asiang lo-a kiseh na khat anin gamsa sisa luang ahikeh anin innsa ahikeh anin leitunga a bokvak ganhing - khatpeuh a lawnkhak leh amah in a theih khak loh hangin anin suaka, a khial ahi hi.

3 “‘Ahikeh amah in amah a ninsak ding na khatpeuh - mihing nitnate a lawn leh amah in a theikha kei zongin a theih ciangin a khial ahi hi. ^b

4 “‘Ahikeh mi khat in ngaihsun khol loin na khatpeuh hih dingin a tomlawh khak leh asia-a apha zongin - ngaihsun khol lopi-a kiciamna thu ah - amah in a theikha kei zongin a phawk ciangin tua bang thu-ah akhial ahi hi.

5 “‘Mi khatpeuh hici bangte khatpeuh a khialh leh a bawlsa mawhna kipulak pelmawh dinga 6 ama hihsa mawhna dan dingin TOPA tungah mawhna hanga biakna-in ganhon panin tuuno a nu khat ahikeh keel a nu khat paipih ding hi; tua ciangin siampipa in ama adingin a mawhna hanga thoihdamna a bawlsak ding hi. ^c

7 “‘Amah in tuuno a neih zawh kei leh vakhu nih ahikeh kawl-vakhuno nih, a mawhna dan tangin TOPA tungah pia dinga - khat pen mawhna hanga biakna hi-in, a khat pen meihal biakna ding ahi hi. 8 Amah in a masapen mawhna hanga biakna-in a piaksak ding siampipa kiangah a puak ding hi. Amah in alu angawng ah hektan dinga bottat loin 9 mawhna hanga biakna gan sisan pawlkhat, baikna-tau pangte thehin, sisan a omlaite biakna-tau bulah a kitakkhiasak pelmawh ding hi. Tua in mawhna hanga biakna ahi hi. 10 Tua ciangin siampipa in ngeina omsa-a hihzia zui-in meihal biakna bangin pia dinga, ama hihsa mawhna tangin ama adingin thoihdamna bawlsak dinga tua ciangin amah kimaisak ding hi. ^d

11 “‘Ahi zongin amah in vakhu nih ahikeh kawl-vakhuno nih a neih zawh kei lai leh ama mawhna hanga biakna dingin annel limci ephah ^{▼▼5.11 Tua pen quart 2 bang (litre 2 bang)} khat sehsawm suah sehkhat mawhna hanga biakna dingin a paipih ding hi. Amah in sathau ahikeh gimnamtui a sawh kei ding hi, bang hang hiam cih leh tua in mawhna hanga biakna ahi hi. 12 Amah in siampipa kiangah paipih dinga siampipa in phawk nadingin khut dim khat pham dinga, biakna-tau tunga TOPA mai-ah mei-a hal biakna tung sawnah a hal ding hi. Tua in mawhna hanga biakna ahi hi. 13 Hici bangin siampipa in ama hihsa mawhna khatpeuhte tang dingin thoihdamna bawlsak dinga, tua ciangin amah kimaisak ding hi. An-a biakna-a mah bangin biakna-a kipia a omlai teng siampipa aa ahi hi,’ ci in,” a ci hi.

Khialhna hanga Biakna

14 TOPA in Moses tungah: 15 “TOPA na asiangtho khatpeuh tawh kisai-in mi khat in sawmkhol lopi-in ngongtatin mawhna a hih khak ciangin amah dan piakna-in tuuhon panin tuutal khat, mun siangtho shekel ^{▼▼5.15 Tua in ounce 2/5 (gram 11.5 bang)} tawh kizui-in nguntanga a man kiseh a sitbang lo khat TOPA kiangah a paipih ding hi. Tua pen khialhna hanga biakna ahi hi. 16 Amah in a siangtho nate tawh kisai a hih khialhte ditkikna bawl pelmawh dinga a kiseh zah sehnga suah sehkhat gawm behin siampipa tungah a vekin pia khin dinga amah in khialhna hanga biakna bangin tuutal-in thoihdamna bawlsak dinga tua ciangin amah kimaisak ding hi. ^g

17 “Mi khat in, TOPA thupiakte lak panin a kham khat peuh semin a mawh leh amah in a thei kha kei zongin akhial hi a, amah in tua mawhna a khu hi. 18 Amah in tuuhon panin aman dinga kiseh zah aman, a sitbaang lo tuutal khat khialhna hanga biakna-in siampipa tungah a paipih ding hi. Hici bangin sawmkhol lo-a, a hih khaksa khialhna tangin siampipa in ama adingin thoihdamna bawlsak dinga, tua ciangin amah kimaisak ding hi. 19 Tua in khialhna hanga biakna hi a, TOPA tungah khialhna-sate ^{▼▼5.19 Ahikeh ama thuak ding dan a cingin thuaksak} hang ahi hi,” a ci hi.